තිරු කුමාර් නඩේෂන් අද අල්ලස් කොමිසමට
පසුගිය දිනවල බොහෝ ආන්දෝලනයට තුඩු දුන් පැනඩෝරා පත්‍රිකා සිද්දිය සම්බන්ධව හිටපු අමාත්‍යවරියක මෙන්ම අග්‍රාමාත්‍ය මහින්ද රාජපක්ෂ මහතාගේ හා ජනපති ගෝඨාභය රාජපක්ෂ මහතාගේ ඥාති දියණියක වන නිරූපමා රාජපක්ෂ මහත්මියගේ සැමියා වන තිරුකුමාර් නඩේෂන් මහතා අද උදෑසන 10.00 ට අල්ලස් හා දූෂණ මර්ධන කොමිසම හමුවේ පෙනීසිටීමට නියමිතය. ඒ ඉහත සඳහන් කළ පැනඩෝරා පත්‍රිකා සම්බන්ධව ප්‍රකාශයක් ලබාදෙන ලෙස කොමිසම විසින් කරනලද දැනුම්දීමකට අනුවය. අල්ලස් හා දූෂණ මර්ධනය විමර්ශන කොමිසමේ විමර්ශන අධ්‍යක්ෂක ජේෂ්ඨ පොලිස් අධිකාරී නුවන් අසංක මහතාගේ උපදෙස් මත පොලිස් කණ්ඩායමක් විසින් මෙම ප්‍රකාශ ලබාගැනීමට නියමිතය. පැනඩෝරා පත්‍රිකා වල නම් සඳහන් ශ්‍රී ලාංකික පුද්ගලයන් පිළිබඳව මසක් ඇතුලත පරීක්ෂණ පවත්වා තමන් වෙත වාර්තාවක් ලබාදෙන ලෙස ජනාධිපතිවරයා අල්ලස් හා දූෂණ මර්ධනය කොමිසමට නියෝගකර තිබුණි.
